جمهور الاهلي 💪

جمهور الأهلى حاجه استثنائية .. التعصب والدعم بشتى الطرق لكيان بدأ واتأسس لفكره الوطنيه ودعم المصريين ضد المحتل الاجنبى رسخت عبر قرن كامل حب وعشق للنادى الاهلى ورموزه .. 

جمهور الاهلى الحقيقى اللى بيسافر وراه ويشجعه مش بس كوره .. ده سله ويد وطايره واى لعبه فيها اسمه .. جمهور بقى مرتكز ومبدأ ماشى عليه واسلوب للحياه كامل هو الاهلى .. ناس كتير مننا بالنسبالها الاهلى مجرد فريق فيه 11 لعيب من افضل لاعبى مصر بيلعبوا 90 دقيقه و بيجيبوا كام بطوله وخلاص .. وناس بالنسبالها الاهلى حياة .. وعالم تانى خالص بعيد عن الواقع المزرى بيأثر فى حياتك .. بتتعامل مع كيان بالعظمه والمبادئ والتاريخ والرموز دى بأجلال واحترام .. ف زى ما النادى ده فرحك فى مره انت هتدعمه وهتشجعه وهتقف وراه مهما بلغ التحديات من جهد وعرق متواصل بدون مقابل ..

التعصب للأهلى وحده وتشجيعه ودعمه ده اللى بيفرق ما بين الاهلاوى الحقيقى وبين اللى لسه عارف الاهلى من كام سنه ..فيه أهلاوى شرب حب الاهلى شرب .. عارف وفاهم ومقدر حجم النادى ده .. وفيه اللى ميعرفش مين مختار التتش ولا سمع عن الحديدى ولا كلف خاطره وعرف شخصيه مهمه زى كابتن صالح الله يرحمه وبقى بالنسباله الاهلى سوبر ستارز بيلعبوا.. و فيه اللى اخد الاهلى طريق وضهر ليه مهما وقع معاه ووراه فى اى مكان واى وقت.. وفيه اللى اخد الاهلى وسيله تفرحه لأنه بيكسب او لذر الرماد فى العيون ..

جمهور الاهلى مبيتعصبش غير للاهلى ومبيشجعش غيره .. مبتنزلش الدمعه غير ليه .. جمهور الاهلى بيشجع كيان كامل مش فرقه كوره من 11 لاعب .. جمهور حب الكوره لأجل الأهلى .. مش حب الاهلى علشان احسن كوره فى مصر وبيجيب بطولات .. جمهور نحتته الازمات والانكسارات والهزائم وقوته وفرحته الانتصارات والارقام القياسيه والأنجازات وواقف ورا فريقه تحت اى سماء وفوق اى ارض ..

جمهور الاهلى ملوش غير الاهلى يفرحه وده كفايه اوى عليه مش عايز غيره يتعصبله ولا يشجعه .. لأنه بالنسباله الاهلى هو اعظم نادى فى الكون كله .. ميتحطش اسمه فى مقارنه مع اى نادى تانى مهما كان اسمه او جنسيته .. جمهور الاهلى تعرفه من مدرج مش بوست على الفيس او طلعه وهشتاج على تويتر .. تعرفه انه رافع راسه مهما فريقه اتعرض لأزمه او خسر فهو دايما راسه مرفوعه بيعتز بفريقه ومبيدورش على اى وسيله تانيه تفرحه بدل للأهلى .. وهو خسران رافع راسه وليه لا وهو نادى الشعب ونادى افرقيا الاول ومفيش نادى فى القاره كله يتقارن بيه .. 

مبنزايدش على حد ومبنوزعش صكوك حب الاهلى على الناس .. لكن والله ما فى حاجه تملى عين جمهور الاهلى غير اسم الأهلى وكفى ..

#يحيا_الاهلى