حين مات باجيو واقفا

باجيو .. الرجل الذي مات واقفا 

في كاس العالم 1994، كان العالم كله بيبص على ماردوانا اللي بيرقص رقصته الاخيرة.. وبيعقد مقارنة بين روماريو نجم البرازيل والهداف الذي لا يتوقف عن التهديف وروبيرتو باجيو.. افضل ما انجبت ايطاليا بعد البيتزا...

المنافسة بين الاتنين كانت على اشدها.. مين ياخد فريقه بعيد في كاس العالم.. خاصة بعد مشهد ماردوانا.. ماردونا جاب جول في اليونان وجري ناحية الكاميرا وهو بيصرخ.. دا كان اخر هدف دولي لماردونا.. لانه بعد المباراة التانية ليه.. ثبت تعاطيه منشطات الايفيدرين... فاتطرد من كاس العالم.. 

ماردونا كان شايف انه مظلوم لانه متعود يشرب مشروب الطاقة Rip Fuel... المشروب دا في الارجنتين مفيهوش ايفيدرين لكن في امريكا في افيدرين وهو مكانش يعرف الفرق... بعد كدا قال إنه كان متفق مع الفيفا ياخد المشروب دا لانقاص الوزن وقالوله انت تمام بس غدروا بيه في البطولة.. وعملوا بيه شو.. وكان مشهد خروجه ساعتها هو الاشهر في كاس العالم... مشي ماردونا وفاضلك باجيو وروماريو..

الصدف وقعت الاتنين بعيد عن بعض يعني مش هيتقابلوا غير في النهائي.. روماريو كان هداف بالفطرة.. اديله الكرة وخلى الفريق التاني يسنتر.. باجيو كان رمانة ميزان يعرف يظبط الفريق كله.. يعني هو أفضل لاعب في العالم عام 93

أفضل لاعب في أوروبا عام 93، فالصحافة كلها اشتغلت على روماريو وباجيو.. الاتنين.. مين الافضل.. مين هيشيل الكاس.. مين اللي هيفرح بلده..

ووصلت ايطاليا للنهائي ووصلت قصادها البرازيل.. والاتنين مسجلين كل واحد 5 أهداف... المباراة مكانش فيها حاجة وخبلصت 0-0 وراحوا الاتنين لضربات الجزاء..

دخل باريزي لاعب ايطاليا يشوط راح حطها في السما.. فلاعب البرازيل داخل يشوط ضيعها.. وبعد كدا سجلوا.. لحد ما جات الضربة الرابعة لايطاليا فضيعها ماسارو، وسجل دونجا للبرازيل... كدا 3-2، والضربة الاخيرة لايطاليا لو جات تلعب البرازيل الضربة الاخيرة لو ضاعت يبقى البرازيل بطل العالم..

مين يدخل يشوط الضربة ... باجيو..

قبل ما يشوط باجيو.. فباجيو اصلا مسيحي.. وبقى بوذي... وهو اصلا عايش في قلب ايطاليا بلد الفاتيكان... فاللي هو الناس بتبصله بنظرة مختلفة.. لمادخل باجيو يشوط.. مكانش بايده انقاذ الطليان ولا حاجة... هو كان هيديهم امل.. هو نفسه اللي وصلهم للنهائي.. لانهم كانوا قريبين من الخروج.. يعني ايطاليا في البطولة دي جابت 8 اهداف.. هو جايب 5 منهم... 

دخل يشوط بضفيرته الشهيرة.. فراح شايط الكورة عالية خالص.. وراح باصص للارض.. وكان الحياة وقفت بعدها.. وقفت بالنسباله خالص.. عارف روماريو المنافس بتاعه قال إيه: "عندما رأيت روبرتو باجيو واقفا بتلك الطريقة لمدة طويلة، ذهبت مني نشوة الفوز بكأس العالم".

صورة كسرة باجيو بقت اشهر صور كاس العالم 94.. وبقت من اشهر صور كاس العالم بشكل عام... وكتبت الصحافة: "باجيو.. مات واقفا".. وفي قول مشهور في ايطاليا "سيغفر الرب للجميع الا روبيرتو باجيو"..